Rapport Onderwysfonds

Universiteit Vrystaat ondersteun ROF

philmarie — Sun, 25 Mar 2012 08:52:23 +0000

Die Universiteit van die Vrystaat (UV) het ‘n skenking van altesaam R75 000 aan die Rapport Onderwysfonds gemaak. Die gelde word uitsluitlik gebruik vir die opleiding van Afrikaanse studente wat hulself in die onderwys wil bekwaam. Prof Jonathan Jansen, UV-Rektor en Visekansellier sê die Rapport Onderwysfonds het reeds hul bekwaamheid bewys ten opsigte van die verspreiding van geldelike ondersteuning aan studente en ook hul toewyding tot verandering in die land deur onderwys. Die UV is dus trots om met die Rapport Onderwysfonds geassosieer te wees. Op die foto ontvang me. Phil-Marie Roberts, bemarkingsbestuurder van die Rapport Onderwysfonds, die reuse tjek van mnr. Mickey Gordon van die UV.

virseker : Elke polis sit glimlag op ‘n kind se gesig

philmarie — Sun, 04 Mar 2012 10:11:41 +0000

PSG KONSULT (PTA-OOS) ONDERSTEUN RAPPORT ONDERWYSFONDS

philmarie — Sun, 04 Mar 2012 09:08:00 +0000

PSG Konsult Pretoria-Oos het ’n skenking van R15 000 tot die Rapport Onderwysfonds gemaak om te verseker onderwysers word opgelei om Afrikaanse onderrig in skole te gee.

Die kantoor bestaan al agt jaar in Pretoria-Oos en die 8 direkteure en 32 personeel werk saam om kundige, ervare en beproefde beleggingsadvies oor ‘n wye spektrum van beleggingsinstrumente aan hulle kliente te bied. “Dit is vir ons belangrik om Afrikaanse moedertaal onderrig te ondersteun en moedig dit graag aan”, het mnr Leon Mostert, plaaslike direkteur gesê. “Ons kliëntebasis kom grotendeels uit die Afrikaanse gemeenskap en ons wil graag iets vir die gemeenskap teruggee. Om jongmense te kan bystaan wat uiteindelik weer op hulle beurt eendag die gemeenskap sal kan bystaan is ‘n groot voorreg.”
Dit is maatskappye soos PSG Konsult Pretoria-Oos, wat ‘n belegging in Afrikaans se toekoms maak sodat die taal kan floreer en groei en kan voortleef!
(PSG Konsult Pretoria-Oos kan gekontak word by 012 349 1620.)

ABSA bele in opvoeding

philmarie — Sun, 12 Feb 2012 08:59:07 +0000

‘n Ruim geldelike skenking deur Absa aan die Rapport Onderwysfonds (ROF) het Afrikaanse onderrig ‘n yslike hupstoot gegee. Me. Mihloti Mathye, bestuurder van korporatiewe sosiale beleggings van Absa, het ‘n tjek vir R300 000 aan Bokkie Gerber, redakteur van Rapport, oorhandig. Soos wat verlede jaar ook die geval was, is die skenking van Absa ter geldelike ondersteuning van Afrikaanssprekende studente wat onderwys wil studeer. ROF het vir vanjaar meer as 500 aansoeke ontvang en maak, volgens me Phil-Marie Roberts, bemarkingsbestuurder van ROF, baie staat op die korporatiewe sektor se ondersteuning. Beursaansoeke van 146 studente vir vanjaar is goedgekeur. – Hanri Wondergem (Foto : Cornel van Heerden)

Distell Stigtig gee ROF ‘n hupstoot

philmarie — Sun, 05 Feb 2012 08:42:18 +0000

Die Rapport-Onderwysfonds (ROF) het ’n skenking van R30 000 van die die Distell Stigting ontvang vir die opleiding van twee belowende Afrikaanssprekende onderwysstudente.
Die Distell Stigting fokus op die finansiering van akademiese opleiding (soos beurse en ander finansiële ondersteuning), asook nie-akademiese opvoeding (soos lewensvaardighede). Met sy opvoedingsprojekte glo hy dat daar op meer as net die akademiese ontwikkeling van ’n mens gefokus word.
“Goeie opvoeding/opleiding het ook ’n uitwerking op ’n mens se lewensvaardigheids- en emosionele ontwikkeling. Ons glo ’n goeie opvoeding is die sleutel tot ’n belowende toekoms en ekonomiese groei,” sê Sonja Morkel, kontroleerder van die stigting se maatskaplike beleggings.
“Ons is opgewonde oor die beginsels van die model waarvolgens die ROF werk, naamlik dat die beurs nie bloot ’n skenking aan ’n behoeftige student is nie, maar dat diegene wat die beurs ontvang, op sy/haar beurt ook iets in die fonds en die gemeenskap terugploeg. Daardeur, meen ons, word nie ’n gees van afhanklikheid gekweek nie, maar veel eerder van verantwoordelikheid en pligsbesef.”
Die ROF het baie groot waardering vir die Distell Stigting se betrokkenheid. “Ons is opreg dankbaar vir hul ondersteuning. Sonder die betrokkenheid van maatskappye soos Distell, asook die betrokkenheid van die gemeenskap, sal die ROF nie kan voortgaan met hierdie noodsaaklike projek nie,” sê Phil-Marie Roberts, bemarkingsbestuurder van die ROF.

DAMES GEE GROOT AAN ROF

philmarie — Sun, 13 Nov 2011 10:45:48 +0000

Die Dameskring het die Rapport Onderwysfonds (ROF) die afgelope week met ‘n skenking van R140 000 ‘n groot hupstoot gegee. Me. Mignon Smit (tweede van regs), nasionale voorsitter van die Dameskring, en me. Lynn Kruger, uitvoerende beampte, het die tjek op ‘n besoek aan Rapport se kantoor in MediaPark in Johannesburg aan die ROF oorhandig. Heel links is mnr. Hennie de Wet, sekretaris van die ROF, en heel regs Bokkie Gerber, redakteur van Rapport en voorsitter van die ROF.
“Moedertaal-onderrig is vir ons baie belangrik. Daarom dra ons lede getrou by tot die fonds sodat leerlinge wat in Afrikaans onderrig word, ook die geleentheid kry om ‘n beurs te kan ontvang. Daardeur wil ons Afrikaanssprekende leerlinge aanmoeding om hul moedertaal te gebruik”, se Smit. Altesame 146 aansoeke om studiebeurse van sowat R1,8 miljoen in 2012 is reeds goedgekeur. Onder die suksesvolle aansoekers is 30 bruin en een swart student. (Foto : Nicolene Olckers)

Durbanville Sakekamer netwerk op Loch Lynne

philmarie — Sat, 15 Oct 2011 22:55:53 +0000

Durbanville Sakekamer het Woensdagaand ’n netwerk-geleentheid by Loch Lynne Wynkelder gehad. ‘n Paar professionele sakemanne het spreekbeurte gekry om hul besighede te bemark waarna daar heerlik gekuier is en verder netwerking gedoen is. “Dis waar sakemanne mekaar ontmoet”, sê Regardt Nelson, tesourier van die sakekamer. Hierdie netwerkgeleenthede wat die Sakekamer skep, is ‘n uitstekende platform waar sakemanne met gemak hul besighede bemark en nuwe sake-vriendskappe gesmee word.

Die Rapport Onderwysfonds (ROF) was ook uitgenooi om vir hulle meer inligting te gee rakende die Fonds. ‘n Oud-student van ROF, Me. Marelize Nel (25) en tans Wiskunde-onderwyseres, het vertel watter groot impak ROF in haar lewe gemaak het. Sy was aangewys as die top onderwysstudent in haar 2de, 3de en 4de jaar, en in 2010 die Rektor toekenning vir opvoedkunde ontvang en is baie dankbaar teenoor ROF wat haar potensiaal raakgesien het en die nodige finansiele ondersteuning gegee het. Sy het die gemeenskap uitgenooi om betrokke te raak by ROF sodat onderwysstudente gehelp kan word wat daarna streef om ‘n positiewe verskil aan Afrikaanse moedertaal onderrig in skole te maak.

Wynland Gholfers maak harte en hande oop vir ROF

philmarie — Sat, 15 Oct 2011 22:31:21 +0000

Rapport het saam met die Paarl gholfklub die Kaap aan die brand gespeel met ‘n gholftoernooi wat al vir meer as 30 jaar plaasvind. Die Rapport Wynlandweek gholftoernooi het op Saterdag 8 Oktober afgeskop en elke dag is daar gholf gespeel tot 15 Oktober. Elke dag het gesorg vir groot gholf-opwinding met verskeie korporatiewe maatskappye wat die verskillende dae geborg het.

Rapport Onderwysfonds het die geleentheid gebruik om fondse in te samel. Langebaan Country Estate het wonderlike pryse geborg sodat ROF deur middel van die verkoop van lootjie kaartjies verskeie gelukstrekkings kon doen. Die golfspelers was baie ondersteunend en het hulle hande diep in die sakke gesteek. ROF bedank Langebaan Country Estate opreg vir hulle groot bydrae, asook elke golfspeler wat ‘n bydrae gemaak het en daardeur daadwerklik betrokke geraak het om voornemende onderwysstudente finansieel by te staan.

Bethlehem Rapportryers swaai die golfstokke vir ROF

philmarie — Sat, 23 Jul 2011 22:27:20 +0000

Bethlehem Rapportryers het ‘n paar jaar gelede besluit om elke jaar ‘n bydrae te maak vir die Rapport Onderwysfonds uit hul jaarlikse fondsinsamelingsprojekte. Daar is toe besluit om jaarliks ‘n golfdag te reel met ‘n unieke karakter vir Bethlehem, naamlik die “Bokke Golfdag”. Die pryse wat uitgeloof word bestaan grotendeels uit wildsbok-karkasse (Blesbokke en takbokke) wat deur boere in die omgewing geskenk word. ‘n Groot deel van die netto inkomste word geskenk aan ROF. Daarmee wil hulle graag die hoofdoelwit van die ROF ondersteun naamlik om ‘n bydrae te lewer om te verseker dat ons kinders steeds die voorreg sal hê om in Afrikaans onderrig te word op skool. Ook dat hulle hoёr onderrig kan ontvang in hul moedertaal, Afrikaans.
Danksy die goedgesindheid van skenkers het hulle reeds die Gholfdag as een van die hoogtepunte op die kalender van die plaaslike gholfklub gevestig en poog steeds om nog groter sukses te verseker sodat hul bydraes aan die ROF ook dermate kan toeneem. Hierdie is maar één van die stimulerende projekte wat die korps aanpak om Afrikaans en die Afrikaner-kultuur te bevorder. Skakel gerus vir Dawie Kriel (084 553 3299), Bethlehem Rapportryers.

Parmalat glo in SA se toekoms

marnia — Wed, 20 Jul 2011 11:44:50 +0000